P. O. C ബൈബിള്
പുതിയ നിയമം
യാക്കോബ്
അദ്ധ്യായം 4
-
ലൗകികതൃഷ്ണ
- Verse 1: നിങ്ങളുടെ ഇടയില് തര്ക്കങ്ങളും ഏറ്റുമുട്ടലുകളും ഉണ്ടാകുന്നത് എങ്ങനെയാണ്? നിങ്ങളുടെ അവയവങ്ങളില് പോരാടിക്കൊണ്ടിരിക്കുന്ന ദുരാശകളില് നിന്നല്ലേ അവ ഉണ്ടാകുന്നത്?
- Verse 2: നിങ്ങള് ആഗ്രഹിക്കുന്നതു നിങ്ങള്ക്കു ലഭിക്കുന്നില്ല. നിങ്ങള് കൊല്ലുകയും അസൂയപ്പെടുകയും ചെയ്യുന്നു. എന്നാല്, നിങ്ങള്ക്ക് ഒന്നും ലഭിക്കുന്നില്ല. നിങ്ങള് വഴക്കിടുകയുംയുദ്ധം ചെയ്യുകയും ചെയ്യുന്നു. നിങ്ങള് ആവശ്യപ്പെടുന്നില്ല; അതിനാല് നിങ്ങള്ക്കു ലഭിക്കുന്നില്ല.
- Verse 3: ചോദിച്ചിട്ടും നിങ്ങള്ക്കു ലഭിക്കുന്നില്ലെങ്കില്, അതു നിങ്ങളുടെ ദുരാശകളെ തൃപ്തിപ്പെടുത്താന് നിങ്ങള് തിന്മയായിട്ടുള്ളവ ചോദിക്കുന്നതുകൊണ്ടാണ്.
- Verse 4: വിശ്വസ്തത പുലര്ത്താത്തവരേ, ലോകത്തോടുള്ള മൈത്രിദൈവത്തോടുള്ള ശത്രുതയാണെന്നു നിങ്ങള് അറിയുന്നില്ലേ? ലോകത്തിന്റെ മിത്ര മാകാന് ആഗ്രഹിക്കുന്നവന് തന്നെത്തന്നെ ദൈവത്തിന്റെ ശത്രുവാക്കുന്നു.
- Verse 5: നമ്മില് നിക്ഷേപിച്ചിരിക്കുന്ന ആത്മാവിനെ ദൈവം അസൂയയോടെ അഭിലഷിക്കുന്നു എന്നതിരുവെഴുത്തു വൃഥാ ആണെന്നു നിങ്ങള് വിചാരിക്കുന്നുവോ?
- Verse 6: അവിടുന്നു കൃപാവരം ചൊരിയുന്നു. അതുകൊണ്ടാണ് ഇങ്ങനെ എഴുതിയിരിക്കുന്നത്: ദൈവം അഹങ്കാരികളെ എതിര്ക്കുകയും എളിമയുള്ളവര്ക്കു കൃപ കൊടുക്കുകയും ചെയ്യുന്നു.
- Verse 7: ആകയാല് ദൈവത്തിനു വിധേയരാകുവിന്; പിശാചിനെ ചെറുത്തു നില്ക്കുവിന്, അപ്പോള് അവന് നിങ്ങളില്നിന്ന് ഓടിയകന്നുകൊള്ളും.
- Verse 8: ദൈവത്തോടു ചേര്ന്നുനില്ക്കുവിന്; അവിടുന്ന് നിങ്ങളോടും ചേര്ന്നുനില്ക്കും. പാപികളേ, നിങ്ങള് കരങ്ങള് ശുചിയാക്കുവിന്. സന്ദിഗ്ധമനസ്കരേ, നിങ്ങളുടെ ഹൃദയങ്ങള് ശുചിയാക്കുവിന്.
- Verse 9: ദുഃഖിക്കുകയും വിലപിക്കുകയും കരയുകയും ചെയ്യുവിന്; നിങ്ങളുടെ ചിരി കരച്ചിലായും, നിങ്ങളുടെ സന്തോഷം വിഷാദമായും മാറട്ടെ.
- Verse 10: കര്ത്താവിന്റെ സന്നിധിയില് താഴ്മയുള്ളവരായിരിക്കുവിന്. അവിടുന്നു നിങ്ങളെ ഉയര്ത്തും.
-
സഹോദരനെ വിധിക്കരുത്
- Verse 11: സഹോദരരേ, നിങ്ങള് പരസ്പരം എതിര്ത്തു സംസാരിക്കരുത്. സഹോദരനെതിരായി സംസാരിക്കുകയോ സഹോദരനെ വിധിക്കുകയോ ചെയ്യുന്നവന്, നിയമത്തിനെതിരായി സംസാരിക്കുകയും നിയമത്തെ വിധിക്കുകയും ചെയ്യുന്നു. നിയമത്തെ വിധിക്കുന്നെങ്കില്, നീ നിയമം അനുസരിക്കുന്നവനല്ല; മറിച്ച്, അതിന്റെ വിധികര്ത്താവത്രേ.
- Verse 12: നിയമദാതാവുംന്യായാധിപനുമായി ഒരുവനേയുള്ളൂ. അവിടുന്നു രക്ഷിക്കാനും നശിപ്പിക്കാനും കഴിവുള്ളവനാണ്. എന്നാല് അയല്ക്കാരനെ വിധിക്കാന് നീ ആരാണ്?
-
ആത്മപ്രശംസ പാടില്ല
- Verse 13: ഇന്നോ നാളെയോ ഞങ്ങള് ഇന്ന പട്ട ണത്തില് പോയി, അവിടെ ഒരു വര്ഷം താമസിച്ച്, വ്യാപാരം ചെയ്തു ലാഭമുണ്ടാക്കുമെന്നു പ്രഖ്യാപിക്കുന്ന നിങ്ങളോട് ഒന്നു പറയട്ടെ.
- Verse 14: നാളത്തെനിങ്ങളുടെ ജീവിതം എങ്ങനെയുള്ളതായിരിക്കും എന്നു നിങ്ങള്ക്കറിഞ്ഞുകൂടാ. അല്പനേരത്തേക്കു പ്രത്യക്ഷപ്പെടുകയും അതിനുശേഷം അപ്രത്യക്ഷമാവുകയും ചെയ്യുന്ന മൂടല്മഞ്ഞാണു നിങ്ങള്.
- Verse 15: നിങ്ങള് ഇങ്ങനെയാണ് പറയേണ്ടത്: കര്ത്താവു മനസ്സാകുന്നെങ്കില്, ഞങ്ങള് ജീവിക്കുകയുംയഥായുക്തം പ്രവര്ത്തിക്കുകയും ചെയ്യും.
- Verse 16: നിങ്ങളോ, ഇപ്പോള് വ്യര്ഥ ഭാഷണത്താല് ആത്മപ്രശംസ ചെയ്യുന്നു. ഇപ്രകാരമുള്ള ആത്മപ്രശംസ തിന്മയാണ്.
- Verse 17: ചെയ്യേണ്ട നന്മ ഏതാണെന്നറിഞ്ഞിട്ടും അതു ചെയ്യാതിരിക്കുന്നവന് പാപം ചെയ്യുന്നു.
